Истеъмолчи учун харид қилаётган маҳсулотининг сифати муҳим. Айниқса бу жараёнда ахборот технологияларини қўллаш орқали маҳсулотга мувофиқлик сертификатлари мавжудлигини ҳамда уларнинг ҳақиқийлигини аниқлаш долзарб. 
Ички Ишлар вазирлиги Тергов Департаменти томонидан мувофиқлик сертификатини қалбакилаштириш ҳолати юзасидан берилган маълумот истеъмолчилар ва тадбиркорларни яна бир марта огоҳликка чақириб, маҳсулотларнинг мувофиқлик сертификатига  эътиборли бўлишга ундайди.
“Ўзстандарт” агентлиги томонидан соҳада шаффофликни таъминлаш мақсадида 2020 йил февралдан бошлаб мувофиқлик сертификатлари электрон тарзда махсус ахборот тизими орқали расмийлаштириш йўлга қўйилиб,  Давлат Божхона қўмитасининг “Ягона дарча” идоралараро ахборот тизимига интеграция қилинди.
Шунингдек, мувофиқлик сертификатларини қалбакилаштириш ҳолатларини олдини олиш мақсадида 2020 йил май ойидан QR-код технологияси ва электрон тарзда (инсон аралашувисиз) реестр рақами шакллантирилиши тизими ишга туширилди. 
Сертификатлаштириш жараёнида ахборот технологияларини кенг қўллаш орқали тадбиркорлар томонидан электрон аризаларни бериш ва истеъмолчилар томонидан мавжуд сертификатлар тўғрисида маълумотларни олиш имконияти яратилди. 
Бугунги кунда Сертификатлаштириш миллий тизимида аккредитланган сертификатлаштириш идоралари томонидан расмийлаштирилган ва амалда бўлган мувофиқлик сертификатлари ҳақида тўлиқ маълумотларни “Ўзстандарт” агентлигининг www.sert.standart.uz ёки www.certificate.standart.uz  электрон манзиллари орқали олиш мумкин. 
Бундан ташқари, QR-код сканери мобил иловаси орқали QR-код белгисини сканерлаш орқали маҳсулотнинг номи, ишлаб чиқарувчиси ёки импорт қилувчи ташкилот тўғрисида маълумот олиш мумкин. 
Шуни алоҳида таъкидлаш лозимки, сертификатлаштириш идоралари томонидан тадбиркорларга кўрсатилаётган хизматлар сифатини оширишда  ҳамда маҳсулотларни мувофиқлигини баҳолашда малакали кадрларга эътибор қаратиб келинмоқда.
Шу билан бирга, ўз ишига масъулият билан ёндашмаган, қонунчиликдаги тартиб қоидаларга амал қилмаган ходимларга нисбатан тегишли чоралар кўрилмоқда. Жумладан, Ички ишлар вазирлиги тергов департаменти томонидан ёритилган Ё.Т. исмли ходим 2018 йилнинг сентябрь ойида Республика синов ва сертификатлаштириш маркази маҳсулотларни сертификатлаштириш идорасидан четлатилганлигини маълум қиламиз ва  ҳуқуқни муҳофаза қилувчи идоралар томонидан жиноят иши айблов хулосаси билан тегишлилиги бўйича судга юборилган. 
Шу ўринда, ҳуқуқни муҳофаза қилувчи органларга қонун устуворлигини таъминлашда олиб бораётган ишлари учун миннатдорчилик билдирамиз.
Ҳурматли тадбиркорлар, “Ўзстандарт” агентлиги Сизлардан ўз маҳсулотингизни ишлаб чиқариш ва белгиланган меъёрларга мувофиқлигини баҳолашда яна бир бор огоҳликка чақиради. 
 Юқорида келтирилган ҳолатлар бўйича маълумотларга эга бўлсангиз “Ўзстандарт” агентлигининг ишонч телефон рақамига (78-150-23-00) ва ижтимоий тармоқлардаги расмий саҳифалар орқали йўллашингиз мумкин. 

“Ўзстандарт” агентлиги 
Матбуот хизмати