“Ўзстандарт” агентлиги томонидан жорий йилнинг 1-ярим йиллигида  сертификатлаштириш жараёнлари натижасида жами 60 млрд. 270 млн 604 минг сўмлик  маҳсулотларнинг яроқсизлиги аълум бўлди.

Таҳлил натижаларига кўра, яроқсиз деб топилган импорт маҳсулотларининг қиймати 33 млрд 802 млн 745 минг сўмни ташкил қилди.

Минг афсуски, юртимизда ишлаб чиқарувчиларга кенг имкониятлар яратиб берилишига қарамай айрим маҳаллий ишлаб чиқарувчилар томонидан  ишлаб чиқарилган маҳсулотларидан 23 млрд 652 млн 537 минг сўмлик қийматидаги маҳсулотлари инспекция назорати натижасида яроқсиз бўлиб чиқди.

Агар рақамларга мурожаат қиладиган бўлсак, яроқсиз деб топилган импорт маҳсулотлари давлатлар кесимида таҳлил қилинганида  Хитой (13 млрд 731 млн 674 минг сўмлик машинасозлик, электротехника маҳсулотлари), Россия (11 млрд 762 млн 803 минг сўмлик машинасозлик ва озиқ-овқат маҳсулотлари) ва Ҳиндистон (4 млрд 110 млн 255 минг сўмлик дори воситалари) давлатларининг маҳсулотлари ташкил этганлиги маълум бўлди.

Ушбу яроқсиз деб топилган маҳсулотларнинг асосий қисми машинасозлик ва металл маҳсулотлари (39 млрд 587 млн 372 минг сўмлик), жумладан, Хитойдан келтирилган буғ қозони (котёл паровой) чидамлилигини тасдиқловчи ҳужжатлар мавжуд эмаслиги, йўловчи лифт ускунаси техник регламентда келтирилган хавфсизлик кўрсаткичлари бўйича номувофиқлиги аниқланган.

Шунингдек Ўзбекистонда ишлаб чиқарилган иситиш қозонини сифатини тасдиқловчи ҳужжатлар ва санитария эпидемиология органларининг рухсатномаси бўлмаганлиги ва йўловчи лифт ускунаси техник регламентларда белгиланган хавфсизлик талабларига жавоб бермаганлиги туфайли яроқсиз деб топилган.

Дори ва дори воситалари (17 млрд 177 млн 776 минг сўмлик) жумладан, Хиндистондан келтирилган ребабраун лиофилизированный 20 мг дори воситаси  рн кўрсаткичи бўйича ва Ўзбекистонда ишлаб чиқарилган тиббиёт докаси (марля медицинская) хлорли тузларнинг массавий улуши, сульфат кислотаси тузларининг масса улуши кўрсаткичлари бўйича меъёрий ҳужжат талабларига жавоб бермаслиги.

Озиқ-овқат маҳсулотлари (3 млрд 323 млн 337 минг сўмлик) хусусан, Грузиядан келтирилган тозаланмаган фундук ёнғоғи ва Ўзбекистонда ишлаб чиқарилган нон ва булка маҳсулотлари намлиги бўйича меъёрий ҳужжат талабларига номувофиқлиги аниқланиб, истеъмолга яроқсиз деб топилган.

Ахборот хизмати